සෑම අයෙකුම උපතින් ලද දායාදයකි තමන් සතු මහඟු සම්පතක්, බලයක් වන තමා තුළම ඇති අලෝකය. එම බලය පුද්ගලයාගෙන් පුද්ගලයාට වෙනස් වෙන්න පුළුවන්, අඩු වැඩි වෙන්න පුළුවන්. එදිනෙදා අනේක බාහිර බලපෑම්, ඝට්ටනයන් වලට මුහුණ දෙන මිනිසාගේ ආලෝකය, දැල්වෙන තීව්රතාවය අඩු වැඩි වෙන්න පුළුවන්. එනමුත් සෑම කෙනෙකුටම පුළුවනි තවත් අයෙකුට ආලෝකයක් වෙන්න, අඳුරෙන් එළියට එන්න මග පාදන්න. එම ආලෝක රැස් දහර කෙතරම් කුඩා/සිහින් හෝ විශාල/පුළුල් වුවද, එයට වෙනසක් කළ හැකි වේවි - විශාල වෙනසක්.
එදිනෙදා භාවිතයේ ඇති ගැජට් එහෙක චූටි LEDයකින් විහිදුවන සිහින් ආලෝකය ගැන හිතන්න, අඳුරු වටාපිටාවක දී ඒ සිහින් ආලෝකය මොනතරම් දීප්තිමත්ව බැබලෙනවා ද, මොනතරම් දුරකට විහිදෙන්න සමත්වේ ද?
රළු රළ පෙළන මුහුදු මායිමක ගොඩබිමේ කෙළවරක උසින් උසට නැඟී සිටගෙන තෙරක් නැති සයුරේ ගණාදුරු රැයක රළ මත පදින පුංවි ඔරු, ඈත යාත්රා කරන විසල් නැව් වලට එකසේ පාර කියන ප්රදීපාගාරය - Lighthouse විහිදන එළිය එම යාත්රාවලට මොනතරම් නම් වටිනවා ඇත්ද? පිහිටක් වෙනවා ඇත්ද?
ප්රදීපාගාරය හෙවත් ලයිට්-හවුස් නිර්මාණය වෙන්නේ කටුක කාලගුණ තත්වයන්ට ඔරොත්තු දෙන්න පුළුවන් අන්දමට. දරුණු සුළන් තත්වයට මුහුණ දිය හැකි රවුම් හැඩයට පාදමේ සිට ඉහළට වට ප්රමාණය අඩුවෙන විදියට. එම ශක්තිමත් අට්ටාලයේ ඉහළට වෙන්න සවි කර ඇති විශේෂ ලයිටින් සිස්ටම් එකයි ලයිට්-හවුසියේ ප්රධානම අංගය. එතුළ දැල්වෙන තීව්ර එළිය, තවත් වැඩි කරන කාච (ලෙන්ස්), පිළිවෙළකට සවිකර ඇති දර්පණ තලය කියන සිස්ටම් එක, එයින් අඳුර සිසාරා ඈතට විහිදෙන ආලෝක දහරාව. තමන්ගේ එළිය ලබන්නේ ලොකු පොඩි කවුරුන්ද, එයට තුති ප්රණාම පුද යන්නෝ, අහක බලාගෙන විඩාබර ගමනේ ඇදෙන්නෝ කවුද, කවුරුන්ද කියන එක කිසිම ගානක් නැතුව කිසියම් රිද්මයකට, පිළිවෙළට කැරෙකෙමින් ලයිට්-හවුස් නිරතුරුව එළිය විහිදනවා ඇත.
ඒ වගේම ප්රදීපාගාරය අපිට වැදගත් පාඩම් රැසක් කියා දෙනවා.
මිනිස්සු තමුන්ව සමාජයේ ඉස්මතු කර පෙන්වීමට, වැදගත්කම රෝපණය කිරීමට, කැපී පෙනීමට නෙයෙකුත් දේ කරයි, සල්ලි විසි කරයි. ගැවසෙන ස්ථානයක පිරිසකගේ අවධානය ලබාගැනීමට විවිධ උපක්රම භාවිතා කරයි. එනමුත් එලෙස හඹා යාමකින් තොරව තමුන් ඉන්නා තැන සිටගෙන බැබළිය හැකි බව ප්රදීපාගාරය කියාපානවා නොවේද?
ප්රදීපාගාරයක් මුහුදේ මුර සංචාරයේ යෙදෙන්නේ නැත. එය අවධානය ඉල්ලා කෑගසන්නේ නැත. එය ඈත නොපෙනී යන නැව් පසුපස දුවන්නේ නැත, ඔවුන්ට සමීප වන ලෙස, තමා වටා රොක්වෙන්නැයි අයැද සිටින්නේ නැත.
ප්රදීපාගාරය නිශ්චලව, ස්ථාවරව දිදුලයි - ලොකු පොඩි සෑම කුණාටුවක් හරහාම විශ්වාසදායක සහ දීප්තිමත් එළිය විහිදුවයි. අවශ්යතාවය ඇති නැව් සෑම විටම ප්රදීපාගරය හඳුනාගනී, ඇගයුමට ලක් කරයි.
ප්රදීපාගාරය කියා පාන්නේ: ඔබ උත්සාහයෙන් හෝ "සද්දේ දාලා" පුද්ගලයින් ආකර්ෂණය කරගත යුතු නැති'මුත් අව්යාජභාවය, අනුකූලතාව සහ යහ පැවැත්ම ඔවුන්ව ආකර්ෂණය කර ගනියි, දිනයි කියන වග නොවෙ ද?
ප්රදීපාගාරයේ ආලෝකය එහි සත්යයයි: බැබළීම යනු පරිපූර්ණ බව, ඔපවත් බව හෝ ඝෝෂාකාරී වීම කියන එක නොවේ. ප්රදීපාගාරයේ සත්යය ඉතා පැහැදිලිව සහ විශ්වාසයෙන් ජීවත්වීම ගැන වන අතර, එය කෙරෙහි විශ්වාසය තැබූ පුද්ගලයින් මිත්රත්වයෙන්, රැකියාවෙන් හෝ දයාවෙන් වේවා ස්වභාවිකවම ආකර්ෂණය වේ යන්න නොවෙ ද?
ප්රදීපාගාරයක ආලෝක කදම්බයක් මෙන්, ඔබේ අභ්යන්තර ආලෝකය ජනනය වෙන්නේ විහිදෙන්නේ පිළිවෙලටය:
- ඔබේ වටිනාකම් සමඟ, ඔබේ අරමුණ සමඟ, ඔබේ ලැදිකම සමඟ.
- ඔබට ඔබේ ආත්මය අලෙවි කිරීමට අවශ්ය නැත.
- ඔබ සිටින තැන, සම්පූර්ණයෙන්ම ඔබ ඔබම විය යුතුය.
අදාළ නොවන නැව් ඉවතට යාමට ඉඩ දෙන්න:
- සෑම නෞකාවක්ම ඔබේ වෙරළ සීමාවේ නැංගුරම් ලෑමට අදහස් නොකෙරේ.
- සමහරුන් පසුකර යනු ඇත. සමහරුන් ඔබේ ආලෝකය නොසලකා හරිනු ඇත. සමහරුන්ට එය කිසිසේත් නොපෙනේ, මන්ද ඔවුන්ගේ අභිප්රායන් වෙනස් විය හැකිය.
- ප්රදීපාගාර න්යාය සෑම කෙනෙකුම ආකර්ෂණය කර ගැනීම ගැන නොවේ.
- එය නිවැරදි අය ආකර්ෂණය කර ගැනීම ගැන ය - ආවේගයෙන් නොව අවංකව, උවමනාවෙන් සැරිසරන අය.
ඝෝෂාකාරී ශබ්දයට වඩා නිහඬ ශක්තිය:
- අපි බොහෝ විට පරිමාව (volume) වටිනාකම (value) ලෙස වරදවා වටහා ගනිමු. නමුත් ස්වභාවධර්මයේ ඇති ශක්තිමත්ම බලවේගයන් කිහිපයක් වෙන ගුරුත්වාකර්ෂණය, චුම්බකත්වය, කාලය නිහඬව ක්රියා කරයි.
- අභ්යන්තර ශක්තිය සඳහාද එය එසේම වේ.
- ඇතුළතින් බැබළෙන්න මිනිසුන්ට කෑ ගැසීමට, ඝෝෂාකිරීමට අවශ්ය නැත. ඔවුන්ගේ ආලෝකය ඔවුන්ගේ වචනවලට වඩා හයියෙන් කතා කරයි.
අවසානයේ, ආලෝක කදම්බය ගැන සිහියට ගන්න:
- එබැවින් ඔබ නොපෙනී හෝ නොසලකා හරින ලද බවක් දැනේ නම් කලබල නොවෙන්න, ගැඹුරු හුස්මක් ගන්න, සන්සුන් වෙන්න.
- ඔබේ ආලෝකය අනුන්ට ගැළපෙන ලෙස අඳුරු (dim) නොකරන්න. ඔබේ ජීවිතයට කිසිදා ළඟා නොවනු ඇතැයි අපේක්ෂා කළ නැවක් හෝ ඉලක්කයක් පසුපස දුවන එක නවත්වන්න. අනවශ්යව වෙහෙසට පත් නොවෙන්න.
ප්රදීපාගාරය වෙන්න.
ඔබේ ශක්තියෙන් නැගී සිටින්න. ඔබ බැබළෙන්න, සත්යයෙන් බැබළෙන්න. ඔබ බෙදන ආලෝක දහරාව අඳුර සිසාරා ගමන් කරනවා ඇත. අඳුරෙන් එළියට එන්න මග පාදනවා ඇත.
When you recognize the light within yourself, it becomes easier to see and respect the value in other people.ඔබ,ඔබ තුළ ඇති ආලෝකය (ශක්තිය) හඳුනා ගත් විට, අනෙක් පුද්ගලයින් තුළ ඇති වටිනාකම දැකීමට සහ ගරු කිරීමට පහසු වේ.
No comments:
Post a Comment